O Concello de Culleredo potenciará a práctica de patinaxe artística entre os veciños. O venres finalizou a primeira edición do campus de patinaxe, organizada polo recentemente creado Club Aura e o Concello.

A estrea desta actividade estival reuniu a medio centenar de pequenos cullerdenses, de diferentes idades e niveis, que hoxe exhibiron o aprendido aos seus proxenitores no acto de clausura do campus. Unha coreografía acompañada a ritmo da música conformou a actuación que recibiu o sonoro aplauso do público.

As calidades que promove esta modalidade deportiva e o interese demostrado no municipio levan ao Concello de Culleredo a ampliar as opcións de práctica para os veciños na programación deportiva do curso que agora comeza. O goberno local estreará actividade de patinaxe artística para adultos, que se unirá á levada a cabo para os pequenos.

A inscrición na iniciativa terá lugar na última semana do mes de setembro. Previamente, o Concello dará a coñecer a oferta completa.

Á clausura do campus de patinaxe acudiron o concelleiro de Deportes, Miguel Suárez, e a concelleira de Cultura, Alicia Ferreiro, que felicitaron aos pequenos pola súa participación e fixéronlles entrega dun diploma conmemorativo.