A Jesús Ángel Dubra, a súa filla Iris Dubra Dorado e o seu afillado Ángel Barrio Dubra úneos, ademais dos vínculos familiares, a mesma paixón: o karate. Veciños de Culleredo, practican o seu deporte favorito na Escola de Karate L.N. de As Brañas e esta tempada 2023/24 foi moi especial para eles, xa que os tres proclamáronse vencedores do Campionato galego de Karate nas súas respectivas categorías.

Jesús Ángel é o campión galego de kata en categoría de veteranos entre 46 e 56 anos; Iris vención en kumite feminino de menos de 36 quilos; e Ángel impúxose en kumite masculino de menos de 35 quilos na competición organizada pola Federación Galega de Karate e Disciplinas Asociadas.

Tanto Ángel como Iris (por terceira vez consecutiva) formarán parte da selección galega de Karate e D.A. que representarán a Galicia no Campionato de España infantil, que se celebrará en Guadalaxara os días 27 e 28 de abril. Súmanse así á tamén cullerdense Daniela García Rey, membro do Kárate-Do Carballo e campioa galega xuvenil na categoría de máis de 52 quilos.

A primeira tenente de alcalde e concelleira de Deportes, Cristina Pardo, subliña “o
esforzo e a disciplina desta familia de campións, que levan orgullosos o nome de Culleredo en todas as competicións nas que participan”. Ademais, desexoulles “toda a sorte do mundo para o Campionato de España de Guadalaxara”.