ES / GL

Campamentos de verán 2017

24 Marzo, 2017. 20:22

O Concello de Culleredo convoca os seus campamentos de verán para nenos e nenas, cos que pretende favorecer a conciliación da vida laboral e familiar de cara á época estival. Estas actividades estarán orientadas a fomentar a convivencia a través de xogos, talleres, excursións e outras dinámicas grupales rexidas polos valores de cooperación, respecto, igualdade e apoio mutuo.

A oferta municipal, dirixida a nenos de entre 3 e 12 anos, inclúe campamentos de distinta duración. Así, haberá dúas quendas de cinco semanas, dúas de tres, e outras dúas de dúas, todas elas entre o 26 de xuño e o 1 de setembro. As actividades desenvolveranse de luns a venres, excepto festivos, en horario de 9.00 a 14.00 horas.

Así mesmo, os pais terán a posibilidade de deixar aos seus fillos a comer, para o que o horario se ampliaría ata as 15.30 horas. En canto ao lugar, o CEIP Díaz Pardo acollerá as actividades dirixidas a nenos de entre 3 e 5 anos, e a Ría do Burgo albergará os campamentos de 6 a 12.

O período de solicitude de praza estará aberto desde este luns, día 27, ata o venres 7 de abril. Os interesados terán que acudir ao Servizo de Educación, sito en Servizos Múltiples, e presentar os documentos pertinentes para acreditar a necesidade de conciliación familiar. O 27 de abril publicarase a listaxe definitiva dos admitidos, tras o que se abrirá o prazo de matrícula, do 2 ao 12 de maio.

A esta iniciativa municipal terán acceso preferente as persoas empadroadas en Culleredo, así como aquelas familias que acrediten por escrito a súa necesidade de conciliación.