O Concello de Culleredo quere implicar a cidadanía para a elaboración dos orzamentos municipais de 2025. Para iso, os veciños e veciñas poden remitir as súas propostas, que deben ter vocación de interese xeral e ser de execución viable para a administración local.

O prazo para presentar achegas está aberto ata o 9 de setembro. Pódese realizar no correo electrónico participa@culleredo.es ou polo Rexistro Municipal.

As propostas deben contar cos seguintes datos:

• Nome e apelidos do/a propoñente
• De ser o caso, asociación ou entidade á que representan
• Título e descrición detallada da proposta

Requisitos para presentar ideas, segundo o Regulamento de Participación Cidadá:

• Persoas físicas: ter 18 anos cumpridos e figurar empadroadas desde o 31 de decembro de 2023
• Persoas xurídicas: estar inscritas debidamente no Rexistro Municipal de Asociacións

As propostas recibidas serán informadas e asesoradas polo persoal técnico de cara á redacción do proxecto de orzamentos. Poderán supoñer ata un 25 % do anexo de investimentos.

O goberno de Culleredo anima a veciñanza a trasladar as súas ideas para adaptar ao máximo os orzamentos ás necesidades da cidadanía.