A Dirección de Rexistros e Notarías tardou practicamento tres anos na creación e posta en funcionamento desta notaría. É a primeira coa que conta desde que no 1936, como consecuencia da Guerra Civil, desaparecera a notaría que había no Burgo.

Con anterioridade, desde 1790 a 1849, Culleredo contou con escribáns por nomeamento real que actuaron sucesivamente en Celas, Alvedro e O Burgo. A última petición oficial realizada polo goberno local foi en xullo de 2003. Naquel momento o Concello solicitou á Dirección Xeral a creación da notaría no municipio tendo en conta o aumento de poboación e que a veciñanza tiña que desprazarse ata municipios veciños como Arteixo, Oleiros e A Coruña para acudir ás súas respectivas notarías.