Culleredo deu a coñecer aos escolares do municipio o patrimonio pictórico de Urbano Lugrís, do que hai varias obras na igrexa de Vilaboa. En total, 55 nenas e nenos de 4º de primaria do CEIP Isaac Díaz Pardo puideron contemplar os cadros do pintor, e aprender os principais motivos da súa obra.

Os pequenos non pararon de tomar notas en todo momento, e os máis atrevidos mesmo tentaban copiar os trazos de Lugrís. En todo momento estiveron acompañados polo historiador de Culleredo, Carlos Pereira, quen mellor que ninguén lles achegou a historia destes cadros ao vencellamento que estes teñen co municipio.

Dentro desta actividade do programa EducaCulleredo,impulsado polo Concello, trátase de dinamizar e poñer en valor a riqueza cultural e artística da contorna. Neste caso, a través das obras dun dos pintores máis importantes para Galicia.