ES / GL

Culleredo adapta o servizo de padrón aos requisitos da lexislación

2 Marzo, 2018. 18:29

O Concello de Culleredo informa da regularización levada a cabo no Servizo de Padrón. Ata agora este servizo completo prestábase na Casa do Concello e no Edificio de Servizos Múltiples. En Vila Melania podíanse solicitar volantes de empadroamento; as certificacións ou as altas e baixas podíanse pedir, pero tramitábanse na Casa do Concello, sendo entregadas días máis tarde por un notificador.

A nivel legal de protección de datos xa non se pode contemplar esta posibilidade e por iso os servizos técnicos determinaron que o padrón se efectúe na Casa do Concello e en Servizos Múltiples, onde existe o rexistro.

Agora, a petición de volante de empadroamento, único trámite que se facía en Vila Melania, pódese realizar vía telefónica no 981677777. O Concello enviarao ao domicilio do solicitante. Os volantes colectivos débense tramitar in situ, como xa ocorría antes.

Polo tanto, o único servizo de padrón que se ofrecía en Vila Melania pódese realizar por teléfono. O resto de peticións, por cuestión legal de protección de datos, débese realizar en Servizos Múltiples ou Tarrío.

O Concello ten abertos dous rexistros: o xeneral na Casa do Concello e o auxiliar no Edificio de Servizos Múltiples, creado para achegar á administración á trama urbana. Os servizos técnicos municipais xa determinaron que non se poden crear máis. Cabe destacar que o funcionamento de dous rexistros supón un importante esforzo a nivel de persoal e organización para un Concello.