ES / GL

A Policía Local constata o respecto ás prazas para mobilidade reducida tras a campaña feita

22 Decembro, 2016. 19:56

Seguridade Cidadá

A campaña de sensibilización para o uso das prazas reservadas para persoas con mobilidade reducida está a funcionar. É o que acaba de constatar o Concello de Culleredo na campaña especial de vixilancia levada a cabo pola Policía Local en todos os estacionamentos do municipio.

O resultado é alentador. Os axentes non tiveron que formular ningunha denuncia xa que non se detectou ningún uso indebido das prazas.

A campaña tivo lugar a semana pasada, desde o 12 ao 18 de decembro. Os axentes pasaron a diario polas prazas comprobando se estaban ocupadas por vehículos con tarxeta e que esta fose válida e actualizada.

Desde o mes pasado todas as prazas de estacionamento para mobilidade reducida contan, ademais de con o preceptivo sinal de tráfico, cun cartel que reza "Ponte na miña pel, non na miña praza". Foi unha iniciativa do Concello de Culleredo e a asociación ASEM co obxectivo de tocar a fibra sensible dos condutores, apunta o primeiro tenente de alcalde, José Ramón Rioboo.

Por agora o resultado é satisfactorio, pero a Policía Local seguirá con un control continuado destes aparcadoiros, subliña Rioboo. O edil avisa de que "non cesaremos no noso empeño de que estas prazas dean servizo exclusivamente aos veciños que lles corresponde".

Campaña alcoholemia

Ademais desta campaña, tamén a semana pasada e en virtude da colaboración que mantén o Concello coa Dirección Xeral de Tráfico, efectuouse unha campaña de vixilancia sobre a condución baixo os efectos do alcol e drogas. Dos controis realizados realizáronse dúas denuncias por taxa elevada de alcol na zona urbana, que foron postos a disposición do xulgado.