O salón de plenos de Culleredo abarrotouse rápido o pasado xoves. Máis dun centenar de nenos e novos, acompañados dos seus proxenitores, desprazáronse ata o Concello para recibir o recoñecemento do alcalde, Julio Sacristán, á tempada do Club Baloncesto Culleredo. O rexedor estivo acompañado de Alicia Ferreiro, concelleira de Cultura, e de Miguel Suárez, de Deportes.

Acompañados dos seus adestradores, os xogadores recibiron o parabén do rexedor polo "excelente curso" realizado. O Club Baloncesto Culleredo é unha das principais entidades deportivas do municipio, con participantes en todas as categorías, desde a biberón.

Pero máis que os resultados, que foron moi bos con ascensos incluídos, o Concello quixo destacar o espírito formativo do club. "O club traballa como unha escola de vida e ese é o verdadeiro éxito", destacou Sacristán.

O primeiro edil aproveitou o acto para avanzar a próxima reforma que acometerá o Concello na polideportivo Ría do Burgo, en Fonteculler. O goberno local dotarao de parquet para mellorar o firme e favorecer así a práctica deportiva.

A idea inicial do Concello consistiu en financiar a actuación cos plans de obras da Deputación da Coruña. Con todo, ao non considerar esta posible introducir actuacións en recintos deportivos como este, o proxecto, xa elaborado, terá que ser financiado a cargo do orzamento municipal.

"Tratamos de non escatimar no mantemento das instalacións deportivas para que os miles de cidadáns que practican deporte en Culleredo dispoñan de espazos en boas condicións", apuntou o rexedor, que asegurou que o club de baloncesto terá sempre o apoio municipal para continuar coa súa vocación.

Moi emocionado mostrouse nas súas palabras Paco Botas, presidente do club, que enxalzou o traballo e esforzo de xogadores, adestradores e pais