O goberno de Culleredo mantén na educación un dos eixos prioritarios da actuación municipal, dentro das poucas competencias que na materia lle corresponden. O combate ao fracaso escolar é unha das accións que impulsa o Concello para apoiar aos mozos.

Así, o Concello de Culleredo lanza o programa "Supérate", un conxunto de clases de apoio para a preparación das probas libres de obtención do Graduado en Educación Secundaria Obrigatoria. Está dirixido aos mozos que no seu día abandonaron os estudos.

A iniciativa contará con clases e sesións de reforzo onde se axudará aos participantes a desenvolver e comprender os contidos dos exames. Así mesmo, os mozos recibirán orientación de cara ás posibles saídas laborais ou de continuación de estudos unha vez conseguido o aprobado nestas probas.

Os interesados en apuntarse a poden facelo na Concellaría de Educación, sita no Pazo de Vila Melania (Vilaboa), ou chamando ao 981 661208.

A concelleira de Educación, Carmen Varela, resalta o esforzo continuado do Concello para "proporcionar o máximo apoio aos mozos en materia educativa". Neste sentido, "Supérate" únese ao programa "Ponte a punto", unha serie de talleres que se celebran no verán, encamiñados a colaborar cos alumnos cullerdenses que teñen materias pendentes para os exames de setembro ou ben que desexan mellorar as súas técnicas de estudo.