Cheo absoluto no auditorio do Conservatorio Municipal de Música na Gada de Nadal do Concello de Culleredo. Un gran espectáculo de carácter interxeneracional que combinou a excelencia artística da compañía de teatro El Ruiseñor coas impresionantes voces da coral Fonte do Souto.

Dúas propostas que por si soas non paran de obter éxito pero que a pasada semana uniron as súas virtudes ofrecendo un espectáculo que desatou a admiración dos máis de 200 asistentes.

Artistas de todas as idades conformaron este espectáculo. Houbo desde nenos de 4 anos ata octoxenarios da coral. Durante a función, unha conxugación entre a teatralidade e as cancións dos maiores.

A concelleira de Cultura, Alicia Ferreiro, destaca o gran éxito desta fusión orixinal entre dúas agrupacións "que alcanzan a excelencia non seu ámbito". A edila explica que o Concello aposta por potenciar o traballo dedicado das asociacións e entidades locais para ofrecer "alternativas de lecer e calidade para todos os públicos".