O Concello de Culleredo comeza o ano cunha forte programación cultural e de ocio para os máis pequenos do municipio. A primeira actividade do 2013 achegará aos nenos e nenas a partir de 8 anos de idade no mundo da maxia.

A iniciativa non se limita a un espectáculo. O Concello programa un obradoiro de maxia con anterioridade para dar resposta ás inquedanzas dos pequenos sobre o mundo da maxia. Terá lugar no Edificio de Servizos Múltiples do Burgo o xoves 3 a partires das 17.00 horas. Para asistir é necesario formalizar a inscrición na Biblioteca do Burgo, sita na primeira planta de dita dependencia.

Posteriormente, ás 19.30 horas celebrarase a actuación do recoñecido Mago Pablo. Neste caso a entrada será libre.

A actividade enmárcase na campaña “Lata – quilo – libro” que está a desenvolver a Concellaría de Cultura que dirixe Alicia Ferreiro. Así, todos os nenos e nenas que asistan e que queiran amosar a súa solidariedade coas familias máis necesitadas de Culleredo, poden facelo aportando unha lata de conservas, un quilo dalgún alimento ou un libro.