Aparte das grandes pontes, hai no concello diversos elementos para salvar os ríos. Dende simples pedras esparexidas, ás chamadas pontellas, moitas veces consistentes nunha gran laxa de beira a beira, ou, se o río é un pouco máis ancho, apoiada en piares ou cepas de pedra. Tamén, nalgún caso, se utilizan simplemente trabes de madeira. Son asimesmo moi numerosos os "portos", que consistían en lastrar os ríos de pouca fondura, para facilitar o paso de carros, etc., evitando que quedasen enterrados na lama ou na area do río. Neste caso, a microtoponimia de Culleredo é abundante: portos, portiños, etc., aparecen na maior parte das parroquias.