O Concello de Culleredo recibiu hoxe a primeira visita oficial da conselleira de Infraestruturas, Éthel Vázquez, con motivo de diversas actuacións na materia que pedira o goberno municipal. O alcalde, Julio Sacristán, e o primeiro tenente de alcalde, José Ramón Rioboo, recibírona no salón de plenos, nun encontro no que participaron ademais concelleiros do grupo de goberno, do PP e de Marea Veciñal, e o delegado territorial da Xunta, Ovidio Rodeiro.

 

A conselleira confirmou importantes investimentos para o municipio, atendendo as demandas que en febreiro lle transmitiu o alcalde. Unha das actuacións principais radicará na creación dunha nova senda peonil entre o paseo do río Mero e o Camiño Inglés ao seu paso por Sigrás.

 

Serán máis de 2 quilómetros de senda, tamén adaptada para ciclistas, que permitirá a comunicación segura desde o paseo marítimo do Burgo, coa previsión municipal de seguir ampliando esta rede de corredores fluviais. Executarase en concreto desde a rúa Río Mero ata a zona verde do polígono de Alvedro.

 

Vázquez prevé que este mes de abril se conte xa co proxecto, que terá un orzamento de 700.000 euros. Sacristán confirmou que en canto o reciba acometeranse os trámites oportunos para obter os terreos e polos a disposición da Xunta.

 

Outra das actuacións en infraestruturas de gran relevancia será a renovación da AC-213 entre O Burgo e A Telva, moi esperada no Concello. Mellorarase tanto o firme como as beirarrúas, completándoas en puntos onde faltaban.

 

Tamén se reforzará o firme da AC-400 entre o quilómetro 0 e o 7 de Sigrás a Celas, en zonas puntuais deterioradas. E os mesmo na AC-523 en Ledoño, entre a autovía e a rotonda coa estrada provincial.

 

Este tres proxectos suman unha contía de 750.000 euros e saen hoxe a licitación no Diario Oficial de Galicia. A conselleira apuntou a verán para o inicio das obras.

 

 

Sacristán valorou o "esforzo importante" que supón a realización destas actuacións en Culleredo. Responden a "claras necesidades" para incrementar a seguridade viaria aos veciños.

 

Aproveitando a presenza da titular autonómica, o rexedor trasladoulle dúas novas peticións que Vázquez se comprometeu a estudar. Por unha banda, a creación dunha senda peonil na AC-400, de Sigrás a Celas, completando a xa existente no tramo do Casal.

 

E en segundo lugar, reiteroulle a necesidade de instalar unha pasarela peonil na AC-523 en Ledoño, na rotonda que regula o tráfico cara a Celas e Peiro. Con ela, o Concello quere propiciar un paso seguro aos veciños nunha estrada moi transitada na que xa ocorreron sinistros.