O Concello de Culleredo acaba de celebrar a reunión da Mesa de Contratación na que se propuxo a adxudicación da construción dun aparcadoiro xunto ao centro de saúde do Portádego por 107.000,88 euros. O goberno local, tendo en conta que a Xunta abrirá o esperado centro de saúde nesta zona, programou un importante investimento para a construción dun aparcadoiro, que dea servizo tanto á instalación sanitaria como aos veciños da zona, que verán incrementada a carga de tráfico.

 

O espazo consistirá nun aparcadoiro en superficie, con 70 prazas de estacionamento. Delas, tres estarán reservadas para urxencias, pegadas ao centro de saúde, e dúas para persoas con mobilidade reducida. Tamén haberá espazo de aparcadoiro para motos e para bicicletas.

 

O deseño do aparcadoiro pretende a súa integración coa contorna, e a súa superficie será de céspede armado. Contará con beirarrúa para garantir a mobilidade e plantaranse árbores de folla perenne para crear zonas con sombra.

 

O parking situarase no campo de fútbol 7 que está pegado ao centro de saúde, practicamente en desuso ao non ser empregado por ningún club deportivo. No entanto, o Concello creará un novo parque multideporte próximo, na contorna da lagoa de Fonteculler.

 

O investimento procede do superávit logrado no peche do exercicio de 2015, que se pode dedicar a investimentos financieramente sustentables como esta. Unha vez que se formalice o contrato, o prazo de execución das obras será de tres meses.