O grupo de goberno socialista e o grupo de Marea Veciñal de Culleredo alcanzaron un acordo para desenvolver un traballo conxunto en favor do interese xeral dos veciños do municipio, incluíndo a aprobación dos orzamentos municipais para 2017, o plan POS financiado pola Deputación da Coruña, e as actuacións da estratexia DUSI dotada con fondos europeos. O acordo foi asinado nun acto celebrado no salón de plenos, coa presenza do alcalde, Julio Sacristán, o portavoz de Marea Veciñal, José Juan Santos, e o portavoz do PSOE, Diego Taibo.

 

O consenso alcanzado nace da coincidencia de ambas as dúas formacións de impulsar actuacións para o interese xeral do municipio. Os dous grupos son conscientes, manifestaron, da necesidade de chegar a acordos para lograr o mellor funcionamento posible do Concello, evitando a súa parálise administrativa, situación que prexudicaría aos veciños.

 

"Cando non hai maiorías é necesario negociar", apuntou Sacristán, que puxo de exemplo negativo a outros concellos onde non se alcanzan acordos e vese prexudicado o interese dos cidadáns. "É un bo acordo", resaltou, á vez que destacou que se toca "o máis necesario e urxente" para os veciños.

 

Pola súa banda, o portavoz de Marea Veciñal afirmou que "temos claro que as actuacións deben proceder das asociacións, sindicatos, etc" como é o caso do que propuxeron, que foi aceptado polo goberno local. "Agora obrigaremos o Concello a levalas a cabo", indicou. O acordo foi referendado previamente pola asemblea da formación.

 

Con carácter xeral, os dous grupos márcanse como obxectivos impulsar un pacto amplo con grupos políticos, empresas, sindicatos e entidades sociais para a promoción da economía local e a consecución dun pacto de emprego; promocionar o comercio e turismo local con estratexias dentro da área metropolitana e a Reserva de Biosfera; pór en marcha políticas de mocidade; apostar pola área metropolitana; e comprometerse ao funcionamento dos órganos de participación creados.

 

De cara aos orzamentos son varias as liñas acordadas. En primeiro lugar, a materialización do Plan de Emprego para o persoal municipal e o fomento da contratación de persoas con diversidade funcional en servizos municipais como a xardinaría ou a conserxería de edificios, entre outras.

 

En segundo lugar, en materia de servizos sociais, as dúas formacións manterán a estrutura e infraestrutura actual, e incrementarán a axuda a domicilio nos casos que sexan necesarios. Outra medida irá dirixida ás familias en risco de exclusión social: o Concello impedirá o corte de subministracións de luz, auga ou gas, con acordos coas empresas e asumindo gastos en situacións que o requiran.

 

E en terceiro lugar, o PSOE e Marea Veciñal acordan diferentes investimentos para incluír nos orzamentos. Serán os seguintes:

En canto á estratexia europea, acordan as seguintes liñas de investimento, conxugando cos intereses manifestados polas asociacións:

O PSOE e a Marea Veciñal crearán unha comisión de seguimento deste acordo.