O Concello de Culleredo executa outra actuación para continuar completando o servizo de saneamento no municipio. Nesta ocasión, o goberno local leva a cabo a dotación de rede de recollida de fecais e tamén de recollida de augas pluviais na zona de Valiñas e Sueiro.

Os traballos consisten na instalación dun colector de fecais con catro pozos de rexistro, que permitirán o servizo de rede de sumidoiros, e dun colector de pluviais con catro sumidoiros. Así mesmo disporase formigón nas cunetas.

O orzamento da actuación alcanza os 22.392,88 euros. O prazo de execución das obras é dun mes.

Para o desenvolvemento da actuación é necesario realizar cortes regulados mediante semáforo na AC-400.