O Concello de Culleredo vén de aprobar en pleno extraordinario a proposta de estratexia de Desenvolvemento Urbano Sustentable e Integrado (DUSI) enmarcada na nova convocatoria de fondos FEDER. Baixo a denominación de "Culleredo Vivo", o goberno municipal elaborou un plan de 6,25 millóns de euros, dos que o 80% (5 millóns) serán solicitados á Unión Europa, achegando o Concello os 1,25 millóns restantes.

Para a elaboración do plan o Concello abriu un proceso de participación, que incluíu a celebración de varias reunións con asociacións do municipio. Así mesmo habilitouse un espazo web para poder achegar ideas de actuacións.

O Concello, coas achegas veciñais, elaborou un plan que trata de conxugar as necesidades do municipio coas finalidades que marca a UE na súa convocatoria de fondos.

Así, "Culleredo Vivo" terá un triplo obxectivo estratéxico. En primeiro lugar, potenciar o uso das TIC na relación entre cidadanía e administración. En segundo lugar, maximizar o aproveitamento dos recursos naturais para vertebrar o municipio, mellorando a conectividade interna con medios de transporte seguros e ecoeficientes. E finalmente,  promover a riqueza patrimonial de Culleredo e o seu posicionamento na área metropolitana.

Para conseguir estes obxectivos, o Concello programa un total de 12 proxectos. Serán os seguintes:

• Creación dunha rede de puntos de acceso dixital en todo o municipio: 470.000 euros
• Desenvolvemento dunha plataforma de aplicacións de administración electrónica entre o cidadán, colectivos, empresas e a administración local, e desta con outras administracións: 155.000 euros
• Promoción do transporte eficiente e ecolóxico, con especial atención a fórmulas de transporte colectivo baixo demanda: 250.500 euros
• Desenvolvemento dunha trama viaria sustentable que facilite o tránsito urbano dos cidadáns, especialmente os nenos: 362.000 euros
• Creación dunha rede de corredores fluviais partindo dos ríos Trabe e Valiñas, que conecten o núcleo urbano con puntos de interese patrimonial natural e cultural: 950.000 euros
• Posta en valor de áreas naturais de Culleredo: 550.000 euros
• Posta en valor do patrimonio ligado ao Camiño de Santiago: 150.000 euros
• Descontaminación de terreos da antiga fábrica da Cros, adxacentes ás naves: 400.000 euros
• Humanización da N-550 con medidas de prioridade de peóns fronte a vehículos e cubrimiento da vía do ferrocarril ao seu paso polo Burgo, xerando novos espazos libres: 1.012.500 euros
• Redución do impacto das actividades industriais nas contornas urbanas: 200.000 euros
• Plan de dinamización do comercio local: 250.000 euros
• Xeración de espazos de intervención e participación social: 1.500.000 euros

TOTAL: 6.250.000 euros

O cronograma do plan contempla a realización de accións desde o 1 de outubro deste ano até o 31 de decembro de 2022

O alcalde de Culleredo, Julio Sacristán, explica que o plan pretende complementar ao xa desenvolvido con fondos europeos entre 2007 e 2011, o chamado Plan Dinamo. Entón, grazas á obtención de fondos lograda, o Concello puido acometer grandes proxectos de rexeneración urbana ou eliminación de barreiras e dotación de equipamentos.

O Concello, unha vez que foi aprobada a proposta no pleno, remitiraa ao Estado para o seu posterior estudo na Unión Europea, que será a que determine o que se conceda.