Culleredo celebra este sábado, 22 de marzo, a segunda edición do Día do Patín, unha festa da patinaxe artística pensada para toda a familia. Estará organizada polo Club Aura, en colaboración co Concello de Culleredo e a Deputación da Coruña.

O II Día do Patín terá lugar no polideportivo municipal de Tarrío, en horario de 11.00 a 13.00 horas. O evento está pensado tanto para nenos como para adultos. Contará con moita música e diferentes xogos.

A idea do club é que este día sirva como iniciación na patinaxe artística para moita xente. Así, os monitores ensinarán as figuras básicas e axudarán aos asistentes a ter o seu primeiro contacto con este deporte.

O acceso será totalmente gratuíto, aínda que a organización pide aos asistentes que colaboren coa iniciativa solidaria que están a promover. Baixo a lema de "Adózalle a vida aos demais" búscase a achega de produtos doces, como crema de chocolate, cacao en po ou tabletas de chocolate, que irán parar ao Fondo Municipal de Alimentos. Os produtos doces son unha das necesidades do banco.