Un neno de Culleredo, Daniel Romasanta da Silva, logra entrar no cadro de premiados do Certame de Pintura Rural Fertiberia, que este ano alcanzou a súa XVII edición. Das 37.000 obras recibidas por escolares de todo o país, a pintura de Daniel logrou o cuarto premio, todo un logro dado o gran número de propostas que concursaban.

O pequeno, alumno do CEIP Isaac Díaz Pardo do Burgo, recibiu o premio nun acto celebrado no Conservatorio de Música de Culleredo. O acto reuniu ao conxunto da comunidade escolar cullerdense: o Concello de Culleredo, a Xunta de Galicia, a dirección do CEIP, a ANPA e por suposto os compañeiros de Daniel, que non cesaron en aplaudirlle pola súa fazaña.

En representación do Concello acudiron o primeiro tenente de alcalde, José Ramón Rioboo, e a concelleira de Educación, Carmen Varela. Rioboo felicitou ao escolar en nome do Concello e destacou a gran participación do colexio no certame, con 95 obras enviadas.

"Seguro que o ano que vén poderedes obter outro premio", expresou aos alumnos. O primeiro tenente de alcalde mostrouse "orgulloso" de que un cullerdense se alzase con este premio demostrando as súas grandes calidades artísticas. "O teu traballo vai levar o nome de Culleredo por moitos sitios", apuntou.

O representante de Fertiberia, Pedro Guerreiro, agradeceu a gran implicación dos profesores do colexio para impulsar o certame. Presentou ademais o calendario de 2014 que editará a empresa cos debuxos gañadores, sendo a pintura de Daniel a imaxe dos meses de xullo e agosto.

A empresa, ademais dos premios ao gañador, tivo detalles tanto para a titora da súa clase como para a ANPA do colexio. Ademais, todos os pequenos levaron unha bolsa de Fertiberia con varios agasallos.